August 27, 2025 l Pilipino Mirror
Marami sa atin, lalo na ang mga ordinaryong manggagawa, ang nahuhumaling sa online gambling.
Sa simula, iniisip mo na maliit lang ang taya, siguro P50 o P100 kada laro, pero kapag paulit-ulit, ang perang iyon ay mabilis na nagiging libo-libo. Sa isang buwan, ang P100 kada araw ay aabot sa P3,000. Para sa isang ordinaryong empleyado na may buwanang kita na P20,000, ito ay halos 15 porsiyento ng sahod na puwede sanang ilaan sa pagkain, koryente, pamasahe, o ipon para sa kinabukasan. Nakalulungkot isipin na sa halip na umunlad, napupunta ang kita sa isang bisyo na walang pangmatagalang benepisyo.
Nakababahala rin ang dami ng platforms na nag-aalok ng madaling access sa online gambling. Isa sa mga hakbang ng Bangko Sentral ng Pilipinas ay ang pag-unlink ng GCash at Maya sa mga online gambling platforms. Ang ibig sabihin nito, mas mahirap na ngayong maglagay ng pera sa mga app na iyon.
Para sa akin, ito ay magandang balita. Mas nahihirapan tayong malulong sa bisyo kung may hadlang sa madaliang paglalagak ng pera. Hindi rin ito nagtatanggal ng problemang pampinansiyal ng mga Pilipino, pero ito ay isang hakbang para mabigyan tayo ng pagkakataong mag-isip bago magtaya.
Matututunnan din ng mga nag-oonline gambling na ang disiplina sa sarili ang pinakamabisang sandata. Kahit na may mga platforms na maginhawa, kailangan nating magtakda ng limitasyon. Kung ikaw ay nakararanas ng kahirapan sa paggasta sa online gambling, mahalagang humingi ng tulong at makipag-usap sa pamilya o kaibigan. Maaari ring sumali sa mga support group o gamiting alternatibong libangan na hindi sumisira sa bulsa.
Sa huli, ang pag-iwas sa bisyong ito ay hindi lamang para sa pera. Ito rin ay para sa kapayapaan ng isip at seguridad ng pamilya. Bawat piso na natitipid mo ngayon ay maaring magdulot ng mas maginhawang bukas. Hindi madali ang lumayo sa tukso, pero kung susubukan natin, ang benepisyo ay malaki.
Mas makakamtan natin ang tunay na kasiyahan sa pamamagitan ng pagtatrabaho, pagtitipid, at pamumuhunan sa sarili kaysa sa pabagsak at panandaliang saya ng online gambling.
***The views expressed herein are his own and do not necessarily reflect the opinion of his office as well as FINEX. For comments, email rey.lugtu@hungryworkhorse.com. Photo is from Pinterest.