June 18, 2025 l Pilipino Mirror
Marami sa atin, lalo na ang mga nasa maliit o katamtamang laki ng negosyo, o kahit simpleng indibidwal na gustong palaguin ang ipon, ay mabilis madala ng “magandang oportunidad.”
Isang kaibigan ang nag-alok ng franchising. Isang kakilala ang may kilalang crypto guru. O kaya’y biglang may lumitaw na bagong app na “siguradong kikita.” Pero bago tayo maglabas ng puhunan, tanungin muna natin: may business case ba ito?
Ang paggawa ng investment business case ay hindi lang para sa malalaking korporasyon. Isa itong gabay para hindi tayo mawalan ng direksyon, at higit sa lahat, para hindi masayang ang pinaghirapan nating pera. May agham dito — pagtingin sa market demand, pagcompute ng returns, pag-analisa ng risks. Pero may sining din — ang pakiramdam, ang intuition, ang kakayahang basahin ang galaw ng tao at merkado. Hindi sapat ang “gut feel” lang. Pero hindi rin sapat ang puro numero lang.
Natutunan ko na ang tamang timpla ng datos at instinct ang gumagawa ng solidong desisyon. Kailangan nating itanong: Ano bang problema ang sinusolusyunan ng investment na ito? May kakayahan ba akong pondohan at suportahan ito hanggang kumita? Gaano ako kahanda sa posibilidad na malugi?
Sa artikulong isinulat ko kamakailan, sinabi ko na “investment business case is about making a compelling story, backed by evidence.” Ang layunin ng business case ay hindi lang para makumbinsi ang ibang tao, kundi para tayo mismo ay makumbinsi — na alam natin ang pinapasok natin.
Lalo na ngayon, sa panahon ng AI, mabilis ang galaw ng teknolohiya at ekonomiya. Mas lalong kailangan nating maging matalino at maingat sa bawat pisong ating ilalabas. Kung maliit man ang puhunan mo, dapat malaki ang pag-iisip bago magdesisyon. Dahil sa dulo, hindi lang pera ang nakataya — pati oras, pagod, at tiwala sa sarili.
***The views expressed herein are his own and do not necessarily reflect the opinion of his office as well as FINEX. For comments, email rey.lugtu@hungryworkhorse.com. Photo is from Pinterest.