May 6, 2026 l Pilipino Mirror
Kapag tag-init sa Pilipinas, ramdam agad sa bulsa. Hindi lang init ang tumataas—kasama ang koryente, tubig, at kahit pagkain. Naranasan ko na ‘yan, parehong bilang consumer at bilang may negosyo. At sa totoo lang, hindi mo kailangang magtipid nang sobra. Kailangan mo lang maging mas maingat.
Sa bahay, unang kalaban ang koryente. Aircon ang usual suspect. Hindi ko sinasabing huwag gamitin, pero puwede mong kontrolin. Itaas mo lang nang kaunti ang thermostat, gumamit ng electric fan para tumulong sa circulation, at siguraduhing sarado ang kuwarto.
Maliit na adjustments, pero malaki ang epekto sa bill. Sanayin din natin ang ating mga sarili na patayin ang appliances kapag hindi kailangan. Basic, pero madalas nakakalimutan.
Sa tubig naman, mabilis ding tumaas ang konsumo. Mas madalas maligo, maglinis, at magdilig. Dito pumapasok ang disiplina. Gumamit ng timba kaysa tuloy-tuloy na shower kung kaya. Sa negosyo, lalo na kung may physical store, mahalaga ang regular na pag-check ng leaks at paggamit ng water-efficient fixtures.
Kung may negosyo ka, mas kritikal. Mataas ang foot traffic sa summer, pero kasabay rin ang gastos. Kailangang bantayan ang inventory. Huwag mag-overstock ng madaling masira. Kung may aircon ang shop, i-balance ang comfort ng customer at gastos sa koryente. May mga negosyo na gumagamit ng schedule—full cooling sa peak hours, then moderate lang sa off-peak.
Sa mga negosyante, gamitin ang panahon para magbenta ng tama. Summer promos, bundles, o kahit simpleng upsell ng malamig na produkto. Hindi lang pagtitipid ang laban dito—kundi paghanap ng paraan para kumita habang kontrolado ang gastos.
Sa dulo, ang tag-init ay test ng disiplina. Hindi mo mapipigilan ang init, pero kaya mong kontrolin kung paano ka gumastos. Maliit na galaw araw-araw, ‘yan ang tunay na ipon.
***The views expressed herein are his own and do not necessarily reflect the opinion of his office as well as FINEX. For comments, email rey.lugtu@hungryworkhorse.com. Photo is from Pinterest.