March 04, 2026 l Pilipino Mirror
Marami ang nagtatanong sa akin kung paano ba talaga kumita gamit ang AI.
Hindi lang ito tungkol sa paggamit ng Google o pag-type ng tanong sa chatbot. Ang totoo, ang mga tools tulad ng ChatGPT, Google Gemini, at Claude ay parang bagong kasangkapan sa negosyo. Kung marunong kang gumamit ng spreadsheet o Canva noon para kumita, ganito rin ito. Tool lang sila. Ikaw pa rin ang mag-iisip.
Unang paraan ay serbisyo. Maraming maliliit na negosyo ang walang oras gumawa ng content, mag-reply sa customer, o mag-draft ng proposal. Dito pumapasok ang AI. Maaari kang mag-alok ng social media writing, email marketing drafts, product descriptions, o kahit simpleng chatbot scripts. Hindi kailangan maging programmer.
Kailangan mo lang maintindihan ang negosyo ng kliyente at marunong magbigay ng malinaw na instructions sa AI.
Mas mabilis ang output, mas marami kang proyekto, mas mataas ang kita.
Pangalawa ay pagpapahusay ng sariling negosyo. Kung may online shop ka, puwede mong gamitin ang AI para magsulat ng mas malinaw na product listings at gumawa ng customer FAQs. Kung freelancer ka, gamitin mo ito para maghanda ng mas maayos na proposals at presentations. Mas propesyonal ang dating, mas mataas ang chance na manalo sa kontrata.
Pangatlo ay paggawa ng digital products. May mga gumagawa ng e-books, training modules, at paid newsletters gamit ang AI bilang katuwang sa research at draft. Hindi ibig sabihin na kokopyahin mo ang sagot ng AI. Dapat may sarili kang insight. Diyan ka kikita, sa kombinasyon ng bilis ng makina at lalim ng karanasan mo.
Pero malinaw sa akin, hindi sapat ang marunong lang mag-prompt. Ang tunay na kita ay nasa pag-unawa sa problema ng tao.
Ang AI ay pampabilis lang. Kung marunong kang mag-isip, mag-ayos ng ideya, at maghatid ng halaga, lalaki ang kita mo. Sa huli, hindi AI ang kalaban o bida. Ikaw pa rin.
***The views expressed herein are his own and do not necessarily reflect the opinion of his office as well as FINEX. For comments, email rey.lugtu@hungryworkhorse.com. Photo is from Pinterest.