Reynaldo C. Lugtu, Jr. l September 20, 2023 l Pilipino Mirror
MAHIGIT dalawang linggo na ang lumipas nang sumalubong sa atin ang ‘ber’ months – ang huling tatlong buwan ng taon kung saan punom-puno ng kulturang Pinoy ang ating pang-araw-araw: nariyan na ang mga kanta ni Jose Mari Chan na pinatutugtog na saan man tayo at dahil tinuturing na ngayong malaking simbolo ng Kapaskuhan, ang mga palamuti na unti-unti nang isinasabit at dinidisplay sa malls at sa ating mga bahay, at siyempre pa, ang napipintong pagbibili ng mga regalo, pagplano ng mga pang-Noche Buena at ang samu’t saring mga aktibidad bunsod ng panahon ng Kapaskuhan.
Kasama sa ‘ber’ months ang mga Christmas bonus din na matatanggap natin – o kaya naman ay ang mga ibibigay natin kung nagpapatakbo ng sariling negosyo – isa ito sa pinakamahalagang inaabangan ng mga PIlipino sapagkat dito manggagaling ang ating badyet para makasiguro na masaya ang ating mga mahal sa buhay pagdating ng Pasko.
May isang perspektibo din na magandang pagnilaylayan ngayong ‘ber’ months. Isa na rito ay ang konsepto ng pagbibigay ng regalo. Marami sa atin, lalo na ang mga mas nakatatandang henerasyon, ang nakasanayan nang bumili ng mga panregalo bilang simbolo ng Kapaskuhan.
Sa kabilang banda, nagiging mas creative na rin ang mga Pilipino ngayon sa pagbibigay ng regalo dahil na rin sa hirap ng buhay at ang patuloy na pagtaas ng bilihan, kung kaya nagiging mas praktikal na rin ang pagbibigay ng mga homemade gifts o mga regalo na made with love kung tawagin.
Ang ganitong paraan ng pagreregalo ay isang epektibong paraan ng pagbibigay ng regalo sa mas abot-kayang halaga. Hindi na kailangang galawin ang Christmas bonus at maaaari na itong itabi para sa mas mga kailangang pag-ipunan.
Ilan sa mga dahilan kung bakit mas pinipili ang pagbibigay ng mga homemade gifts ay (1) mas mura ang halaga ng mga gamit na kailangan dahil ang labor ay sa iyo manggagaling; (2) isa itong magandang bonding activity kasama ang pamilya lalo na kung ikaw ay may mga batang anak na gusto mo ring turuan; at (3) nababadyet natin ang ating pera sa paraan na malaki ang naititipid natin at nakapagbibigay pa rin tayo ng regalo sa ating mga pamilya at mga kaibigan.
Halimbawa ng mga homemade gift na patok sa mga reregaluhan natin:
1. Pagkain – kung ikaw ay magaling magluto o mag-bake, subukang magbigay ng mga regalong pagkain ngayong Pasko. Mag-bake ng banana bread, chocholate chip cookies, crinkles, cupcakes, muffins at iba pa at siguradong matutuwa ang mga reregaluhan mo nito. Hindi rin mawawala ang atchara, ube, macapuno at kung ano-ano pa.
2. Plants – kung ikaw ay tinaguriang plantito o plantita, mainam na mag-propagate na ng mga popular na halaman lalo na ang mga may natural remedies para sa iyong mga panregalo. Ang mga halaman katulad ng basil, rosemary, curry leaves, oregano at iba pa ay mabilis tumubo at gamit na gamit sa kusina sa pagluluto ng iba’t ibang ulam. Ang iba pang mga halimbawa na puwede ring ipanregalo dahil na rin sa nakatutulong ito sa kalusugan ay ang insulin (para sa mga matataas ang blood sugar), serpentina (mapait nga lang ang lasa pero mabisa para sa mataas ang presyon), sambong at marami pang iba. Ilagay sa maliit na paso, lagyan ng ribbon at mayroon ka nang magandang regalo na hindi lamang napakaganda, kundi praktikal, sustainable at economical.
Ugaliing maging wais sa paggamit ng pera lalo na ngayong Kapaskuhan. Mainam na planuhin nang maaga ang mga listahan ng reregaluhan nang sa gayon ay mabadyet nang wasto.
*** Ang may-akda ay Founder at CEO ng Hungry Workhorse, isang kompanya na nagbibigay ng serbisyo ukol sa digital at culture transformation. Siya ay nagtuturo ng strategic management sa MBA Program ng De La Salle University. Ang may-akda ay maaring i-email sa rey.lugtu@hungryworkhorse.com